ازاى تتعامل مع الشخصية النرجسية؟

أكيد في أنواع كتير من الشخصيات ومحدش بيفكر أو بيتصرف زى التانى. بدل ما تحاول أنك تغير الناس، اتعلم أنك تتقبل الاختلافات وتعمل توازن لو أنت لازم تتعامل معاهم، وعلشان تعرف تتعامل مع الشخصية النرجسية، اتعلم أنك تتفهم وتحتوى الاختلافات.

1- متحاوش أنك تغير الشخص النرجسى. ركز على احتياجاتك الخاصة وحاول تفهم أن النرجسيين غير قابلين للتغيير، من المهم ليك أنك تشوف مين هما فعلا، مش اللى أنت عايزهم يكونوا. ركز على إحساسك، وعلى أنت عايز تكون ايه. اتفهم حقيقة أن في أنواع وأنماط مختلفة من الشخصيات وأن الحاجة الوحيدة اللى ممكن تسيطر عليها هي مواقفك وردود أفعالك وإحساسك تجاههم.

2- اعرف أن النرجسية بتيجى بس من انعدام الأمان. وأنهم معرضيين للخطر في أعماقهم لأنهم بيحسوا بالتهديد، وبيسألو نفسهم دايما هل هي دى الطريقة اللى هتخليهم يحسوا أنهم أحسن. لما تعرف وتستوعب أن تصرفات الشخصية النرجسية ملهاش سبب شخصى ليه علاقة بيك، لكن نابعة من انعدام الأمان، هتعرف أن أوقات هما بس بيكونوا محتاجين للإحساس بالطمأنينة. وده مهم جدا لو بتتعامل بشكل قريب جدا مع شخص نرجسى، سواء في الشغل أو في أسرتك. إحساسه بالاطمئنان هيخليه أهدى بكتير وهيقلل حدة النرجسية.

3 – اسأل الشخص النرجسى عن الناس هتفكر فيه ازاى مش ازاى هيحسوا بيه. لأن النرجسيين مش بيحسوا بالذنب، لكن بيهتموا بتفكير الناس فيهم بشكل عميق جدا. لو أنت في وضع تقديم المشورة أو النصيحة، اسأله الناس هتفكر ازاى. النرجسيين مش أغبياء، لكن في حاجات، زى مشاعر الناس وإحساسهم، نادرا ما بيحطوها في اعتبارهم. خلى كلامك معاهم يكون على الأفكار مش على المشاعر. و أنت بتشتغل مع شخص نرجسى، ركز على الحقايق والأفكار، مش على المشاعر.

4 – متستناش الموافقة من الأشخاص النرجسيين. أنت مش زى ما هو بيقول، متخليش لعبة اللوم تقلل من احترامك لنفسك، ومتتجادلش معاهم علشان تدافع عن نفسك. ومتحاولش كمان أنك تتناقش معاه علشان تثبتله غلطه، لأنه ببساطة عمره ما هيشوف نفسه غلطان، ومن المرجح أن الموضوع هيزيد سوء لما يختلف معاك بطريقة مش كويسة.


5 – اعرف قيمة نفسك، وابعد عن النرجسيين. لازم أي علاقة تكون صحية من الجانبين، ويكون فيها احترام متبادل وبتقوم على فكرة الأخذ والعطاء. أي علاقة مع شخص نرجسى، من المرجح أنها تكون العكس لأن النرجسى بيدور على سعادته فقط وعايز يحصل على الدعم باستمرار. فالأكيد أنها مش بتكون علاقة صحية.

6 – حط حدود دايما وحافظ عليها. الشخص النرجسى لما بيشوف أنك بتبدأ تستعيد السيطرة على حياتك، بيحاول أنه يختبر حدودك، ودى غريزة عنده. خليك مستعد أنك تعمل حدود واضحة ميقدرش يقرب منها، ويكون عندك كل الإجراءات في عقلك. يعنى مثلا، لو قررت أنك تبطل تتواصل معاهم، من المرجح أنهم هيحاولوا بكل الطرق يكلموك. خليك شجاع بما فيه الكفاية أنك تحافظ على الحدود اللى أنت عملتها.

7 – اتعلم امتى تنسحب. لما الشخص النرجسى يبدأ يحاول أنه يوترك ويخليك مش مرتاح، يبقى ده الوقت أنك تقدر نفسك وقيمتك بأنك تنسحب.

8 – لو أنت بتحب شخص نرجسى، لازم تفكر جديا في أنك تنهى العلاقة وتعيش حياة أفضل. لو كان الشخص النرجسى واحد من أفراد أسرتك، ومينفعش أنك تكون قاسى معاه، حاول أنك تعمل مسافة بينك وبينه.