ده سؤال بيشغل تفكير ناس كتير ، في ناس كتير متعرفش اجابة السؤال ده ، بس في ناس تانية بتعرف كويس تعمل فلوس و ببساطة شديدة و مجهود اقل ، انك تعمل فلوس دي حرفه و مهارة ملهاش علاقة بالشغل لان ناس كتير بتشتغل و برضوا مبتعملش فلوس ، في البوست ده هقولك خبرة ناس كتير من اللي بتعمل فلوس ، مبدئياً لازم تبقي عارف انها مراحل كل ما بتعدي مرحلة بتكسب اكتر في اللي بعدها .
الطريقة الاساسية للحفاظ علي المال هو التوقف عن إنفاقه
دائماً عقل الناس بيفكر اجيب منين لدرجة انه بينسي هو بيصرف في أيه ؟ و ده الأهم لان من السهل انك تكسب فلوس مهما كانت ، لكن طول ما انت معندكش سياسة في الإنفاق هتفقد الفلوس و عمرك ما هيبقي معاك فلوس لان اللي جاي هيفضل يروح لان الالتزامات و الاحتياجات مبتخلص ، يبقي اول حاجة تعملها لازم يبقي عندك سياسة في الإنفاق و تقلل احتياجاتك علي قد تقدر ، و لو مش عارف ازاي ممكن تستعين بمختص في المجال المالي و احفظ القاعدة دي
" الاثرياء يدخرون المال و ينفقون ما تبقي ، اما الفقراء ينفقون المال و يدخرون ما تبقي "
٢ - لازم يبقي عندك قايمة انت بتعرف تعمل أيه ، علشان تعرف ازاي تجيب من مهاراتك دي فلوس و تحولها لمكسب ، و اوعي تستقل بحاجة ، لان ممكن مهارتك تبقي بسيطة بس تعرف تسوقها صح فتحقق مكسب كبير ، الطرق لده كتير يكفي انك ممكن تشتغل من علي الانترنت في مواقع كتير لل freelance ممكن تبدأ و تجرب .
٣ - لازم يبقي عندك قايمة أولويات للشراء ، مش معني ان نفسك تشتري حاجة و معاك فلوسها تشتريها - غلط ، لازم ترتب أولويات الإنفاق و تشتري الضروري فقط و باقي الاحتياجات لما يبقي معاك فلوس زيادة مش عايزها ، لازم تعرف انت بتشتري ده ليه و العائد منه أيه ؟ وارين بافيت قال انه كان نفسه يشتري ساعة روليكس لانه بيحبها جداً بس كان سعرها ٢٠٠٠ دولار فقرار انه هيشتريها لما يبقي معاه ٢٠٠ الف دولار
٤ - مينفعش تعتمد علي مصدر دخل واحد ، اتعلَّم تصنع مصدر دخل جديد ، اتعلَّم جرافيكس ، تصميم مواقع ، ترجمة اَي حاجة تحققك دخل إضافي ، مينفعش تشتغل عند الفلوس لازم الفلوس تشتغل عندك علشان تحققلك أهدافك ، استثمر فلوسك لان الفلوس الثابتة ميته و بلا قيمة .
٥ - ابعد عن الديون و القروض و القسط ، لو مش معاك ثمن حاجة اوعي تفكر تشتريها ، دي حاجة ممكن تخسرك كتير و تدمر الجانب المادي في حياتك ، اللي بيلجأ لده اللي معاه سعر الحاجة كاش لكن هما شغالين و بيحققوا دخل فبيسبهم و يشوف بديل غير مكلف ، الديون فكر فقير .
٦ - العلاقات ، انت هتكون شبه الناس اللي تعرفهم غصب عنك ، احنا كائنات حسيه تتاثر بالتواصل ، هتلاقي نفسك زي أصحابك بتفكر بنفس طريقتهم تلقائياً ، لو عايز تغير فكرك المالي أتعرف علي ناس بتعرف تكسب و بتعرف تتعامل مع الفلوس ، اقراء عنهم ، اسمع نصائحهم ، خليك قريب منهم ياسيدي من جاور السعيد يسعد 😄
٧ - الفلوس بتهرب من اللي بيجري ورآها ، اجبرها تجيلك لحد عندك ، لازم تفكر انت هتقدم أيه و الناس محتاجه أيه و الناس بتدفع فلوس في أيه و بعدين اعمله باحسن طريقة ، في طلبة في الجامعة بتعمل ملازم و بتبيع المحاضرات و في بنت في طب بتفصل البلطوا و تبيعوا ، في اللي بيشتري حاجات و يبعها لزمايله في اللي بيشتغل في ادخال البيانات في حاجات كتير ممكن تعملها ببساطة شديدة اوعي تفتكر انك محتاج فكرة عبقرية خالص ده ساندرز بتاع كنتاكي عمل شوية بهارات من عند العطار و باع فراخ ، عادي يعني 😉
٨ - اجهز للفرصة ، و الله العظيم الفرص بالهبل في كل مكان و كل إنسان بيجيلوا فرص كتير بس المشكلة ان مش كل الناس بتبقي جاهزة لما تيجي الفرصة ، انت بقي خليك ذكي و جهز نفسك ، تخيل انك بتدور علي شغل مثلا و فجاه جه قدامك وظيفة ب ١٠ آلاف في الشهر بس شرط إجادة الانجليزية بطلاقة ... ها أيه بقي ، لو انت جاهز خلصت ، و ده كتير في البزنس علي فكرة بيبقي في فرص كتير بس محتاجه كاش و اللي جاهز بيكسب كتير ، احفظ دي المحظوظ هو الشخص اللي بتجيلوا فرصة و هو جاهز ليها .
٩- اخلص من احتياجاتك ، أو اجلها شويه ، لحد مرحلة الاستقرار المادي ، سلمان الفارسي قال لن تنال ما أردت الا بترك ما تشتهي ، و تيتا بقي هرتني حكم زمان الدنيا مبتديش محتاج ، و الفلوس بتجيب فلوس آه و الله 😄
١٠- دي الزتونة بقي ربنا بيرزق الذكي و الغبي لكن مبيديش الكسلان ، اسعي و خليك مؤمن انك هتاخد اكتر من سعيك ده كريم اوي ، بس ركز التفكير سعي و التخطيط سعي و التعلم سعي و العلاقات سعي و الاستشارة سعي و الشغل سعي ، كل حاجة في الدنيا ممكن لو عرفت ازاي 👌
