ازاي تتفق علي الراتب في الانترفيو ؟

سؤال في أي إنترفيو هو عاوز راتب كام؟
و دي بتكون من أكتر اللحظات الحساسة في الإنترفيو.. لأنك مابتكونش عاوز تبين إنك شخص مادي و في نفس الوقت مش عاوز يتضحك عليك أو تاخد راتب قليل..

طيب هو انت لما بتقدم في شركة.. المفروض اللي بيعمل معاك الإنترفيو هو اللي يقولك على الراتب و لا هو اللي هايسألك انت عاوز كام..؟
بص يا سيدي الفاضل.. في الشركات الكبيرة غالباً بيكون عندهم لائحة بالرواتب مافيهاش كلام.. يعني خريج دفعة كذا بياخد كذا و بالتالي هو مش هايفاصلك في الراتب، إنت لو قبلت في الإنترفيو هايقولك على الـOffer بتاع الشركة و ليك مطلق الحرية انك تقبل أو ترفض، بس أغلب الشركات المتوسطة و الصغيرة مابتعملش كدة.. يعني موضوع الرواتب ده بيمشي بالحب، تقدر تقول كدة تفاوض مع الزبون اللي هو انت.. فصاحب الشغل غالباً هايسألك انت عاوز راتب كام؟ أو متوقع تقبض كام؟ أو تقدر نفسك بكام؟
و دي تحديداً بتبقى أكتر لحظة محرجة في أي انترفيو.. و انت و شطارتك بقى في إنك تعدي منها

طبعاً إنت بتكون ماصدقت أصلاً إن فيه شركة كلمتك و روحت تعمل إنترفيو.. و أمنية حياتك دلوقتي هي إنك تقبل في الشغلانة دي..
فانت بتكون ما بين نارين.. خايف تطلب راتب كبير فالشغلانة تطير منك و تروح لحد تاني هايطلب أقل منك.. و في نفس الوقت برضه مش عاوز تقول رقم قليل و ترخص نفسك و تكتشف بعد كدة إن انت اتضحك عليك و كان المفروض تطلب أكتر من كدة..
هي دي بقى المعادلة الصعبة..!!!

طب #إيه_التصرف_الصح....؟

لازم تبقى عارف يا باشمهندس "سعرك في السوق" كام.. يعني المهندسين دفعتك و اللي بنفس إمكانياتك و مؤهلاتك تقريباً متوسط رواتبهم كام..
طب و دي بقى نعرفها منين....؟
إتقل طيب و كمل قرايه البوست...

بالنسبة للشغل جوة مصر.. المهندس حديث التخرج دفعة 2015 المفروض بأي حال من الأحوال راتبه مايقلش عن من 1500ج لـ 2000ج كحد أدنى

كل دفعة أقدم بتزيد على الأقل 500ج.. يعني خريج 2014 المفروض ياخد على الأقل من 2000 إلى 2500 و خريج 2013 ياخد من 2500 إلىى 3000 و خريج 2012 ياخد من 3000 إلى 3500 و خريج 2011 ياخد من 3500 إلى 4000 ج ...... إلخ
و الأرقام دي قابلة للزيادة و بتعتمد على حاجات كتير منها طبيعة الشغل و حجم الشركة.. و إمكانياتك و مؤهلاتك و خبراتك و الكورسات و البرامج اللي معاك.... إلخ

طبعاً أنا عارف و متأكد و أنا باكتب الكلام ده إن بعض المهندسين ممكن يكونوا شايفين كلامي ده فيه شيء من المبالغة.. و إن الرواتب دي مش موجودة على أرض الواقع، بس أحب أرد عليكوا و أقولكوا.... (لأ) إنتوا غلطانين.. الرواتب دي موجودة بالفعل، و أنا شخصياً أعرف مهندسين متخرجين دفعة 2014 و شغالين جوه مصر و راتبهم يعدي الـ3500ج ، بس للأسف إنتوا اللي مش عارفين قيمتكوا، و أغلب المهندسين بيرخصوا نفسهم و بيتهاونوا في حقوقهم.. و أغلب أصحاب الشركات بيستغلوا النقطة دي لصالحهم.
أحب كمان أقوللكوا إن فرد الأمن النهاردة أو عامل النظافة.. اللي غالباً بيكون مامعهوش مؤهل أو بالكتير إعدادية.. راتبه مابيقلش عن 1500ج
فماينفعش تبقى مهندس و اتعذبت 5 سنين في الكلية و أهلك صرفوا عليك دم قلبهم عشان يشوفوك مهندس و يفرحوا بيك و في الآخر تقبل براتب 800ج و لا 1000ج و الأرقام اللي بنسمعها دي!
هاتقوللي يا بشمهندس.. ماهو ده اللي موجود قدامنا.. يعني نقعد في البيت من غير شغل؟ هاقولك لأ طبعاً.. بس إنت لو عرفت قيمتك و عرفت تتفاوض صح على الراتب هاتعرف تاخد راتب كويس.

طيب خد عندك كدة شوية النصايح اللي هاقولك عليها دي و حطها حلقة في ودانك:

لما المدير يسألك.. عاوز راتب كام؟ اعمل محاولة كدة إنك تتهرب من السؤال و ترمي الكورة في ملعبه هوه ...... إزاااااااااي؟

هاترد عليه بكل لباقه و شياكة و هاتقوله: "الصراحة مش المفروض إن أنا اللي أقيم نفسي.. إنتوا شركة كبيرة و أكيد ليكوا اللايحة اللي بتحدد الرواتب، و أفضل لو حضرتك اللي تقوللي العرض المادي بتاع الشركة و أنا لو يناسبني هاوافق و لو مش مناسب هاعتذر"
كدة يا معلم انت يبقى عملت معاه السليمه و حطيته في خانة اليك و هايضطر هو اللي يقولك على الراتب مش العكس.. بس هو بقى ممكن يطلع أنصح مني و منك و يردهالك تاني و يقولك.. لأ لازم انت اللي تقول تقبل براتب كام أو تقدر نفسك بكام.. أو يعمل حاجة أسهل من كدة و يخليه سؤال إجباري في الأبليكيشن اللي هاتملاها قبل الإنترفيو..
طبعاً في الحالة دي مافيش مفر من إنك تطلب رقم محدد، بس خلي بالك كويس قوي (ماترخصش نفسك) و لازم تطلب أكتر من الرقم اللي انت عاوزة بشويه عشان تسيب مجال للتفاوض (الفصال).. أيوه زي ماقريتها كدة صح #الفصااااااال ... عشان هو هايفاصلك و يساومك على الراتب عشان يديلك أقل راتب ممكن كأنه بيشتري طماطم من السوق، و لو يطول إنه يشغلك ببلاش هايشغلك.

يعني لو انت مثلاً خريج دفعة 2014 و هاتشتغل مهندس موقع و عاوز تقبض 2000 ج و هو سألك على الراتب اللي انت عاوزة.. انت طبعاً مش هاتقوله 2000، هاتقوله 2500ج مثلاً عشان هو هايقولك كتير و الحوارات اللي انتوا عارفينها دي لحد ما في الآخر ترسى على الرقم اللي انت عاوزة.

دلوقتي بقى هاقولك على #5_خدع_شيطانية بيعملهم أصحاب الشركات عشان يضحكوا على الشباب الغلابه اللي زي حالاتكوا..

#الخدعة_الأولى (التثبيت)
=================

و دي من الخدع المشهورة و اللي بتحصل كتير... هايقولك طب يا هندسة.. إنت هاتشتغل معانا أول 3 شهور (فترة إختبار) براتب قليل، و في نهاية الـ3 شهور دول هانعملك إعادة تقييم و نديلك الراتب اللي انت عاوزة (كداااااااااب)
و انت عشان طيب فهاتوافق طبعاً و تقوله Deal
لأ يا معلم.. استنى لما ارسيك ع الحوار انت مش تلميذ.. الراجل ده كدة بيثبتك عشان توافق و غالباً مش هايزودك ولا حاجة ده كلام فض مجالس بس عشان يجر رجلك و بعد كدة هايبقى يتبع معاك سياسة النفس الطويل..
و عشان ماتقعش في الخدعة دي أنسب رد تقولهوله.. هو إنه يديلك الراتب اللي انت طالبه و لو شغلك ماعجبهوش في فترة الإختبار يبقى يمشيك خالص من الشركة

#الخدعة_التانية (التسويــف)
=================

و هي إنه يأجل الإتفاق على الراتب لحد مايشوف شغلك الأول.. و ده طبعاً ماتوافقش عليه عشان بعد كدة انت اللي صباعك هايبقى تحت ضرسه و هاتندم و خليك فاكر دايماً إن اللي أوله شرط آخره نور

#الخدعة_التالتة (الإشتغاله)
=================

و هي إنه يوافق على الراتب اللي انت هاتطلبه و تيجي تقبض آخر الشهر تلاقي الراتب ناقص 400ج مثلاً.. تروح تشتكي للمحاسب إن الراتب ناقص و مش ده الرقم اللي انت متفق عليه فالمحاسب يقولك لأ يا بشمهندس أصل الراتب اللي انت اتفقت عليه ده بيتخصم منه ضرايب و تأمينات، فطبعاً عشان ماتقعش في الخدعة دي فلازم وانت بتتفق على الراتب تعرف الراتب ده Net Salary ولا Gross Salary

#الخدعة_الرابعة (الفخ)
=================

يعني حضرتك هاتتفق على الراتب اللي انت عاوزة و بعد ماتشتغل تكتشف إنك بتصرف نصه على المواصلات عشان مافيش عربيه للشركة و مكالمات التليفون بتاعت الشغل عشان هما ماادولكش خط موبايل و إقامه و أكل و شرب في الموقع عشان مافيش مستلزمات معيشيه مناسبة و إنك بتمشي بعد مواعيد العمل الرسمية بـ3 أو 4 ساعات بدون مقابل، و إن أي يوم تاخده أجازة يتخصم من مرتبك فلوس..
و عشان ماتقعش في الخدعة دي يبقى انت المفروض قبل ماتتفق على الراتب تستفسر عن الإنتقالات و البدلات و مكالمات الموبايل و السهرات و الأجازات و الإضافي و خلافه

#الخدعة_الخامسة (كلام_الليل)
===================

عارف انت المثل بتاع عشمتني بالحلق خرمت أنا وداني.. أهو ده اللي هايحصل معاك بالظبط.. هايتفق معاك على راتب قليل و يوعدك و يعشمك بأي كلام في رغيف.. زي مثلاً إنه كل 3 شهور فيه Bonus بيتصرف للموظفين، أو إن فيه مكافآت و حوافز و أرباح و دلع.. و طبعاً كل ده ولا هاتشوف منه حاجة
الخدعة دي اتهرست في 100 انترفيو قبل كدة و عشان ماتقعش فيها يا معلم يبقى انت أهم حاجة تركز عليها هي الراتب الشهري الثابت، أما الحاجات التانية دي لو جت يبقى خير.. لو ماجتش إنت ليك مرتبك آخر الشهر اللي انت متفق عليه.